Traduzione dal Latino all'Italiano di Epigrammi, Sannazzaro

Est mihi rivo vitreus perenni fons, arenosum prope litus; unde saepe discenens sibi nauta rores haurit amicos. Unicus nostris scatet ille ripis, montis immenso sitiente tractu, vitifer qua Pausilypus vadosum ex- currit in aequor. Hunc ego vitta redimitus alba, flore et aestivis veneror coronis; quum timent amnes et hiulca saevum arva leonem. Antequam festae redeant Calendae fortis Augusti superantque Patri quattuor luces; mihi tempus omni Dulcius aevo. Bis mihi sanctum, mihi bis vocandum, bis celebrandum potiore cultu, duplici voto, geminaque semper turis acerra. namque ab extremo properans Eoo, hac die primum mihi vagienti Phoebus illuxit, pariterque dias hausimus auras. Hac ad insigni peragenda ritu sacra solemnes veniunt ad aras Nazari; unde omnes tituli, meaeque nomina gentis; Nazari vastas cohibentis undas Aequoris, saevosque domantis aestus, quicquid et vani truculenta iussit ira Neronis. O decus caeli, simul et tuorum, rite quem parva veneramur aede; cui frequentandas populis futuris ponimus aras: si mihi primos generis parentes, si mihi lucem pariter dedisti, nunc age; et fontem tibi dedicatum saepe revise.